Қарзи маоши муҳоҷирони тоҷик пардохта шуд

Душанбе, 10.11.15. (АМИТ «Ховар»). — Бо  мусоидати  намояндагии  Вазорати  меҳнат,  муҳоҷират  ва   шуғли  аҳолии  ҶТ дар  ФР  оид  ба  муҳоҷират  қарзи  маоши  муҳоҷирони  меҳнатӣ баробари 1 миллиону  20  ҳазор   рубл   пардохта  шуд. Сокини 34 — солаи  шаҳри  Панҷакент  Шероз Фаёзов, ки  дар  яке  аз  ширкатҳои  сохтмонии  шаҳри  Екатеринбурги  вилояти  Свердловск кор  мекунад, ба унвони намояндагӣ  дар  бораи  расонидани  мадад барои  пардохти  қарзи  маошаш ариза навишта буд.  
Дар  ариза  гуфта  мешавад, ки  корхона  бинобар  вазъи  мураккаби  молиявӣ  маоши  семоҳаашро  напардохтааст. Баъди  муроҷиати   намояндагии ҶТ  дар  ФР  ба  роҳбарияти  ширкат  қарзи  муҳоҷирони  меҳнатӣ  дар  ҳаҷми 1  миллиону 20  ҳазор   рубл  пардохта шуд.
Бо  мусоидати  намояндагии  ҶТ  дар  ФР тайи  10  моҳи  соли  равон  қарзи  маоши  муҳоҷирони  меҳнатии  тоҷик ба  маблағи  38  миллион  рубл  пардохта шуд, ки  нзар  ба  ҳамин  давраи  соли  гузашта  ду баробар  зиёд  аст.