Чанд ҳодисаи нохуши нақлиётӣ дар ду рӯз

Душанбе, 16.11.2015. (АМИТ «Ховар»). — 14-уми  ноябр, ронандаи мошини тамғаи “Опел-Зафира”, сокини 32-солаи  шаҳри Истаравшан ҳангоми ҳаракат бо роҳи нақлиётгарди Душанбе-Хуҷанд-Чанок, дар километри 238-уми ҳудуди ҷамоати деҳоти Зарҳалоли шаҳри Истаравшан бехатарии ҳаракат дар роҳро таъмин карда натавониста, ба қафои мошини тамғаи “Долун”, таҳти идораи ронанда, сокини 38-солаи ноҳияи Бохтар бархӯрдааст. Дар натиҷа, мусофири тамғаи “Опел-Зефира”, сокини 31-солаи шаҳри Истаравшан ҷароҳатҳои вазнини ҷисмонӣ бардошта, дар беморхона ба ҳалокат расидаааст. Ронандаи мошини тамғаи “Опел-Зефира” ва мусофири дигари мошини мазкур низ ҷароҳатҳои ҷисмонӣ бардошта, дар беморхона бистарӣ гаштаанд. 
Ҳамчунин 15-уми  ноябр, ронандаи мошини тамғаи “Муссо”, сокини ноҳияи Данғара ҳангоми ҳаракат аз самти шаҳри Қурғонтеппа ба самти шаҳри Душанбе, дар ҳудуди деҳаи Меҳнати ноҳияи Хуросон аз уҳдаи идораи мошин набаромада, ҷавони 23-солаи сокини маҳалиро пахш намудааст. Дар натиҷа ҷавон ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.