Чорабиниҳои фарҳангӣ бахшида ба Парчами давлатӣ оғоз шуданд

Душанбе, 21.11.2015 (АМИТ “Ховар”). – Субҳи имрӯз дар Китобхонаи миллии Тоҷикистон чорабинии фарҳангӣ бахшида ба Рӯзи Парчами давлатии Ҷумҳурии Тоҷикистон зери унвони “Тоҷикистон хонаи умеди ман” доир гардид.
Дар чорабинии мазкур 300 нафар донишҷӯёну устодони Донишгоҳи давлатии омӯзгории Тоҷикистон ба номи С. Айнӣ, Донишкадаи тарбияи ҷисмонӣ ва Коллеҷи варзишии Тоҷикистон иштирок намуданд. Директори Китобхонаи миллии Тоҷикистон Сайфиддин Назарзода оид ба таърихи парчами давлатӣ маърӯза намуда, сулҳу ваҳдат, созандагию ободкориро баракати  истиқлолияти давлатӣ маънидод намуд. Бо муроҷиат ба ҷавонон таъкид гардид, ки  донишу малакаи худро тақвият диҳанд ва барои баланд бардоштани Парчами Ҷумҳурии Тоҷикистон дар арсаи байналмилалӣ  аз донишу малака, истеъдоду ҳунари хеш истифода намоянд, зеро парчам нишонаи миллат ва муаррификунандаи давлат аст. Муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Мавсума Муинӣ зимни суханронӣ аз ҷавонон даъват кард, ки Парчами давлатии Ҷумҳурии Тоҷикистонро, ки рамзи давлати тоҷикон аст, ҳамеша тозаву озода нигоҳ дошта, барои муаррифӣ намудани миллат ва бардоштани Парчам дар арсаи ҷаҳон саъю талош намоянд, сиёсати роҳбарияти мамлакатро, ки асосаш созандагию ободкорӣ аст, дар амал фарзандонаву содиқона татбиқ намоянд.