Дар Белгия бар асари амалиёти махсус 16 нафар дастгир шуд

Душанбе, 23.11.15. (АМИТ «Ховар»). — Дар  Белгия дар натиҷаи  амалиёти  умумимиллии зиддитеррористӣ, ки  дар таърихи  кишвар  калонтарин  ба шумор  меравад,  16  нафар  дастгир ва  як  нафар  захмӣ  шудааст.  «Пулиси  Белгия  дар ҳафт  маҳалла  кофтуков   кард», — гуфт  дар  нишасти  матбуотӣ  намояндаи Прокуратураи  федералии  Брюссел. — Дар  ҷараёни амалиётҳои  зиддитеррористӣ  дар  Белгия дастгир  намудани гумонбари  асосии  амалиётҳои террористӣ  дар  Париж Салоҳ Абдуислом  муяссар  нагардид». 
Амалиётҳо дар  маҳаллаҳои Моленбек, Жетт, Андерлехт,  Форе, Скарбек, Волюве, Сен — Ламбер,  ҳамчунин  дар  шаҳри Шарлеруа  роҳандозӣ  шуданд. Пулис   аслиҳаю  моддаҳои таркандаро   пайдо  накард. Намояндаи  прокуратура   хабари  ВАО — ро  дар  бораи   тирпарронӣ тасдиқ  накард.
Мувофиқи  маълумоти  прокуратура, яке  аз  гумонбурдаҳо  ҳангоми кӯшиши  дар  мошини  худ  паноҳ бурдан аз  пулис ба автомобили  посдорони тартибот бархӯрда,  захм  бардошт. Дар  амалиётҳо  садҳо  нафар кормандони  пулис  бо  дастгирии низомиён, техникаи зиреҳпӯш  ва  чархболҳо   иштирок  доштанд,  хабар  медиҳад  ТАСС.