Дар Душанбе намоишгоҳи навбатии Чин доир мегардад

Душанбе, 04.11.15. (АМИТ «Ховар»). — Раиси Палатаи  савдо  ва  саноати  Тоҷикистон Шариф  Саид  дар  ҷараёни  Сафари   кориаш  ба  шаҳри Урумчии ҶМЧ бо  сардори Раёсати тиҷорати  Ҳукумати Ноҳияи  Мухтори  Синҷону  Уйғури ҶМЧ  Ся Гуантай  гуфтушунид  намуд.
Тибқи  иттилои  ПСС Тоҷикистон, ҷонибҳо ба  вазъу  дурнамои  рушди  муносибатҳои  Тоҷикистону  Чин,  ҳамчунин  имконоти  тиҷоратию  иқтисодии  ҳамкории дуҷонибаи  кишварҳои  дӯст  таваҷҷуҳи  хосса  зоҳир намуда,  масоили таҳкими  минбаъдаи  муносибатҳо  дар бахшҳои  асосии  иқтисодиётро  баррасӣ  карданд. Раиси  ПСС — и  ҶТ имкониятҳои  зиёди Тоҷикистонро  барои  маблағгузории   бахшҳои  мухталифи  иқтисодиёти  Тоҷикистон  аз  қабили  истифодаи   захираҳои  табиӣ,  иштирок   дар  маблағгузории  лоиҳаҳои  инфрасохторӣ ва гидроэнергетикӣ,  ҳамкорӣ  дар  соҳаҳои  асосӣ,  аз  қабили  кишоварзӣ,  истеҳсолу  коркарди  маҳсулоти  кишоварзӣ, фаъолияти ширкатҳои  Чин  дар  ҳудуди  минтақаҳои  озоди иқтисодӣ зикр  намуд. 
Ся  Гуантай  сатҳи  баланди ҳамкории  мутақобилан  муфиди  байни  давлатҳои  ҳамсояро  хотирнишон  сохта,  мақоми  муҳими  Тоҷикистонро  дар  татбиқи  ибтикороти Роҳи  бузурги абрешими «Як  камарбанд,  як  роҳ»  қайд  намуд. 
Аз  рӯи  натиҷаи  мулоқот  тасмим  гирифта  шуд, ки  охири  моҳи  сентябри  соли  2016  дар  шаҳри  Душанбе  намоишгоҳи  маҳсулоти саноатӣ  ва технологияҳои  Чин  доир намуда, форуми  аҳли тиҷорати  ҳар  ду  кишвар ташкил  карда шавад.