Дар ноҳияи Мастчоҳ бинои иловагии мактаб сохта шуд

Душанбе, 19.11.2015. (АМИТ «Ховар»).-Раиси вилояти Суғд Абдураҳмон Қодирӣ 17 ноябр зимни сафари корӣ дар ноҳияи Мастчоҳ аз ҷараёни корҳои сохтмонӣ дар бинои иловагии мактаби таҳсилоти миёнаи умумии №31- и ҷамоати деҳоти Андарвашт дидан кард.
Бинои дуошёнаи таълимӣ дорои 8 синфхона буда, барои 480 хонанда дар ду баст пешбинӣ шудааст.
Қабл аз ин, бо сабаби дурии роҳ аз маҳаллаи нав то мактаб, ки 2,5 -3  километрро ташкил медод, фарзандони деҳа шароити мусоиди таҳсил надоштанд. Раиси вилоят ба мутасаддиёни сохтмон дастур дод, ки дар ҳудуди бинои иловагии мактаб инчунин майдончаю толори варзишӣ ва ошхона бунёд намоянд, то хонандагони деҳа аз тамоми шароити замонавии таълиму тарбия бархурдор бошанд. Бинокорон тасмим гирифтаанд, ки дар арафаи ҷашни байналмилалии Наврӯз мактаби навро мавриди истифода қарор диҳанд.