Фаъолияти ҳафт ташкилоти қарзии хурд қатъ карда шуд

Душанбе, 16. 11. 2015. (АМИТ «Ховар»).- Раёсати Бонки миллии Тоҷикистон дар асоси моддаи 6 Қонуни Ҷумҳурии Тоҷикистон «Дар бораи барҳамдиҳии ташкилоти қарзӣ» ва бинобар иҷро накардани талаботи Дастурамали №197 “Дар бораи тартиби танзими фаъолияти ташкилоти қарзии хурд”оид ба таъмини андозаи ҳадди ақалли сармояи воқеӣ, бо қарорҳои навбатии худ н фаъолияти ҶДММ ТҚХ “Хубҷамъ”, ҶДММ ТҚХ “Хазинаи Сомониён”,  ҶДММ ТҚХ “Саодат сармоя”, ҶДММ ТҚХ “Кайёниён”, ҶДММ ТҚХ “Дӯстком”, ҶСП ТАҚХ “Дафтари молиявӣ”ва ҶСП ТҚХ “Барҳақ”- ро бо дархости онҳо оид ба барҳамдиҳии ихтиёрӣ қатъ гардонид.
Зикр шуд, ки сатҳи миёнаравии молиявии ташкилоти мазкур тайи чанд соли охир дар бозори молиявии ҷумҳурӣ коҳиш ёфта буд.
Мутобиқи қарорҳои боло иҷозатномаҳои ин ташкилоти қарзии хурд, ки аз ҷониби Бонки миллии Тоҷикистон барои анҷом додани амалиёти бонкӣ дода шудаанд, бозхонд мешаванд.  
Ба замми ин, мақомоти ваколатдори ташкилоти қарзии хурди зикршуда вазифадор шуданд, ки барои анҷом додани расмиёти барҳамдиҳии ихтиёрӣ ва ҳисоббаробаркунӣ бо қарздеҳони ташкилоти қарзӣ комиссияи барҳамдиҳиро таъсис диҳанд. Комиссияҳои барҳамдиҳӣ уҳдадор гардидаанд, ки ба Бонки миллии Тоҷикистон ҳисоботи тавозунӣ ва дигар маълумоти заруриро пешниҳод намоянд.