Хатнасури хайриявии 945 кӯдак аз оилаҳои эҳтиёҷманд

Душанбе, 13. 11. 2015. (АМИТ «Ховар»).- Дар давоми нӯҳмоҳаи соли равон хатнасури хайриявии 945 кӯдак аз оилаҳои эҳтиёҷманд ва камбизоат, инчунин тӯи домодию арӯсии 18 ҷуфт навхонадорон бо ташаббуси мақомоти иҷроияи ҳокимияти давлатии вилоят, шаҳру ноҳияҳо ва сарпарастии корхонаю муассисаҳо, ширкатҳо ва соҳибкорон гузаронида шуд.
Дар ин бора аз Шуъба оид ба корҳои дин, танзими анъана ва ҷашну маросими милии мақомоти иҷроияи ҳокимияти давлатии вилояти Суғд хабар доданд. Зикр гардид, ки тӯйҳои дастаҷамъӣ дар арафа ва рӯзҳои таҷлили идҳои Наврӯз, Рӯзи байналхалқии якдилии меҳнаткашон, Рӯзи байналмилалии ҳифзи кӯдакон, Рӯзи Ваҳдати миллӣ, Рӯзи Истиқлолияти давлатии Ҷумҳурии Тоҷикистон, иди шарифи Рамазону Қурбон ва ҳангоми сафари Президенти Ҷумҳурии Тоҷикистон Эмомалӣ Раҳмон ба шаҳру ноҳияҳои вилоят баргузор  шудаанд.