Хуҷанд: “Дарёи муҳаббат” ҷамъбаст гардид

Хуҷанд, 23.11.15. (АМИТ «Ховар»). -Дар Хуҷанд  вобаста ба эълони  “Соли 2015 — соли оила”шурӯъ аз моҳи апрел баҳри тарғиби арзишҳои оила ва оиладорӣ озмун-маҳфили “Дарёи муҳаббат” баргузор гардид. Он дар ду марҳила, давраи аввал дар маҳаллаҳо ва дуввум озмуни шаҳрӣ гузаронида шуда, дар умум  17 оила иштирок намуд ва 6 оила ба даври ҷамбастӣ роҳхат гирифт. 
22-юми ноябр даври ҷамъбастии озмуни шаҳрӣ доир гашт. Марҳилаи ниҳоӣ аз рӯи  шартҳои зерин, чун пешниҳоди албоми авлодӣ ба таври слайд, ё видеофилм аз беҳтарин лаҳзаҳои ҳаёти оила, насиҳати падару модар ба фарзанд, изҳори муҳаббати фарзанд нисбат ба волидон, намоиши саҳначаи тарбиявӣ дар мавзуъҳои гуногуни оила ва намоиши ҳунари эҷодӣ ва дарёфти ҳалли муаммоҳои оилавие, ки аз тарафи ҳакамон пешниҳод гардиданд, гузаронида шуд. 
Дар ҷамъбаст тибқи маълумоти ҳайати ҳакамон, ҷойи сеюм ба оилаҳои  Қосимовҳо ва Норматовҳо бо мукофотпулии 500 сомонӣ барои ҳар як оила, ҷойи дуюм ба оилаҳои Каримбоев ва Неъматҷоновҳо бо мукофотпулии ҳазор сомонӣ ва  ҷойи якум ба оилаи Холматовҳо бо мукофотпулии ду ҳазор сомонӣ муносиб дониста шуд.
Унвони “Оилаи беҳтарини шаҳри Хуҷанд” ва “Шоҳҷоиза” ба оилаи Қодировҳо аз маҳаллаи “Сари баландӣ” лоиқ дониста шуда, ба онҳо се ҳазор сомонӣ, мукофоти арзишманд ва Дипломи озмуни “Дарёи муҳаббат” супорида шуд.