Иқтисодиёт ва дурнамои рушди манбаъҳои барқароршавандаи энергия дар Тоҷикистон

Душанбе, 13.11.2015. (АМИТ «Ховар).- Дар  Донишгоҳи давлатии Хуҷанд ба номи академик Бобоҷон Ғафуров ҷаласаи ифтитоҳии конфронси илмӣ-амалии ҷумҳуриявӣ таҳти унвони «Иқтисодиёт ва дурнамои рушди манбаъҳои барқароршавандаи энергия дар Ҷумҳурии Тоҷикистон» баргузор гардид.
Матлуба Хоҷаева, муовини ректори донишгоҳ оид ба илм гуфт, ки: «Баъди ба даст овардани Истиқлолияти давлатии Ҷумҳурии Тоҷикистон иқтисодиёти кишвар ба раванди босуботи рушду тараққӣ ворид гардид. Ин самти афзалиятноки ҳаёти ҷомеа бо ҳидояту раҳнамоиҳои Президенти Ҷумҳурии Тоҷикистон ҳамаҷониба такомул ёфта, марҳалаи эҳёи иқтисоди миллӣ фаро расид. Дар ин замина мутахассисони соҳа бо истиқболи барномаҳои ояндабинонаи Ҳукумати Ҷумҳурӣ талош варзиданд, ки ба яке аз ҳадафҳои бузург, ки он «Истиқлолияти иқтисодӣ» унвон дорад, шарафёб шаванд».
Анвар Яъқубӣ, муовини раиси вилояти Суғд оид ба тавлид, интиқол ва истифодаи самараноки энергияи барқӣ ва роҳҳои дарёфти энергияи алтернативӣ маърӯзаи пурмуҳтаво намуда, ҳамзамон аз тадбирҳои муҳими Ҳукумати мамлакат дар ин самт маълумот дод.
Дар конфронс маърӯзаҳои илмии олимон вобаста ба мавзӯи мазкур шунида шуданд.
Конфронс ду рӯз идома меёбад.