Маросими савгандёдкунӣ дар қисмҳои ҳарбии мамлакат

Душанбе, 27.11.2015. (АМИТ «Ховар»).-Шаҳрвандоне, ки ҳамасола ба сафи Қувваҳои Мусаллаҳи кишвар равона мешаванд, баъди шомил шудан ба ҷузъу томҳои мамлакат дар давоми як моҳ ва бештар аз он дар курсҳои кӯтоҳмуддати омодагии ибтидоии ҳарбӣ ба таълиму тарбия фаро гирифта мешаванд.
Дар курсҳо сарбозон асосан бо тартибу низоми хизмати ҳарбӣ, фаъолияти қисмҳои низомӣ, оинномаҳои ҳарбӣ, тартиби дурусти пӯшидани либоси низомӣ, муроҷиат намудан ба афсарон шинос мешаванд. Бояд гуфт, ки чунин курсҳои кӯтоҳмуддати омодагии ибтидоии ҳарбӣ аллакай дар бисёре аз қисмҳои ҳарбии мамлакат анҷом ёфтанд.
Бояд ёдовар шуд, ки барои таълиму тарбияи наваскарон ба курсҳои низомии мазкур афсарони соҳибтаҷриба, ки на камтар аз панҷ сол таҷрибаи корӣ доранд, ҷалб мешаванд, то ҳар як сарбоз ё худ наваскар аз рӯзҳои нахустини шомил гаштан ба сафи Қувваҳои Мусаллаҳ ғамхории давлату ҳукумати ҷумҳурӣ, роҳбарияти Вазорати мудофиа ва роҳбарияти  қисми низомиро эҳсос намуда, софдилонаю содиқона ба модар-ватан хизмат намояд.
Ин гуна маросими савгандёдкунӣ дар тамоми қисмҳои ҳарбӣ то нимаи аввали моҳи декабри соли 2015 идома меёбанд.