Медалҳои нуқра ва биринҷии хонандагони гимназияи «Ҳотам ва ПВ» аз олимпиадаи байналмилалии Таиланд

Душанбе, 9. 11. 2015. (АМИТ «Ховар»).- Хонандагони синфҳои 7-ум ва 8-уми Гимназия-интернати  Тоҷикистону  Русия «Ҳотам ва ПВ» аз 1 то 7 ноябр дар 12-умин олимпиадаи байналмилалӣ оид ба математиқа ва илмҳои дақиқ  -2015  IMSO дар Таиланд иштирок намуданд.  Дар натиҷа хонандагони ин гимназия ҷойҳои дуввум ва сеюмро сазовор гаштанд. Бино ба гуфтаи намояндаи ин гимназия Тӯйчӣ Рашидов дирӯз иштирокчиёни олимпиадаи байналмилалӣ ба Ватан баргаштанд. 
«Далер Пиров дар олимпиада медали нуқра ва ҷои дуввумро сазовор гардид. Глеб Петухов, Умедҷон Икромов, Шохрух Исоматов ва Бахтовар Ҳотамов ҷои сеюм ва медалҳои биринҷиро соҳиб шуданд. Мутаассифона, ба Далер Пиров барои гирифтани ҷои якум якчанд хол нарасид. Вале бояд гуфт, ки Тоҷикистон дар ин олимпиада дар даҳгонаи беҳтарин мебошад. Дар ин олимпиадаи бонуфуз хонандагони беш аз 20 давлати ҷаҳон иштирок намуданд. Хонандагони мо аз рӯи натиҷа аз Эрону Қазоқистону дигар давлатҳо пешсаф буданд»,-гуфт Тӯйчӣ Рашидов.  Бино ба гуфтаи мусоҳиб дар ин олимпиада дигар давлатҳо 3-4 бор  аст, ки ширкат меварзанд, хонандагони Тоҷикистон бори аввал иштирок доранд ва ба ин нигоҳ накарда натиҷаҳои хуб нишон доданд.  «Ҳатто ташкилкунандагони ин олимпиада зикр карданд, ки хонандагони тоҷик мисолҳои душворро дар қатори хонандагони чиниву ҳинду ҳал карда тавонистанд»,-илова намуд Тӯйчӣ Рашидов. Роҳбари дастаи гимназияи Ҳотам ва ПВ оид ба математика, хатмкардаи ин гимназия Олимҷони Пираҳмад дар суҳбат бо хабарнигори АМИТ «Ховар» изҳор дошт, ки барои иштирок дар ин олимпиада онҳо бо мактаббачагон  1 ҳафта тайёрӣ дидаанд. «Бояд хотиррасон кунам, ки олимпиада бо забони англисӣ гузашт ва мо математикаро  ба  хонандагон бо забони англисӣ меомӯзондем.  Мо то оғози олимпиада дар гимназия байни хонандагон олимпиадаҳо гузарондем, то бачаҳоро хубтар омода намоем. Хонандагони гимназияи мо дониши хуби худро ба ҳама нишон доданд. Онҳо на танҳо дониши математикӣ, балки забондонии худро нишон дода, аъзои ҳакамонро дар ҳайрат гузоштанд», — илова намуд  Олимҷони Пираҳмад.  Хотиррасон мекунем, ки хонандагони ин гимназия дар дигар озмуну олимпиадаҳо иштирок намуда, ҷойҳои намоёнро ишғол намудаанд.