Мизи гирд: «Беҳдошти солимии модару кӯдак: дастовардҳо, мушкилот ва нақшаҳои оянда»

Душанбе, 13. 11. 2015. (АМИТ «Ховар»).- Дар  маҷмааи «Душанбе Плаза» бо ибтикори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Ташкилоти умумиҷаҳонии тандурустӣ мизи мудаввар дар мавзӯи «Беҳдошти солимии модару кӯдак: дастовардҳо, мушкилот ва нақшаҳои оянда» баргузор гардид.
Муовини  якуми вазири тандурустии Ҷумҳурии Тоҷикистон Лола  Бобоҳоҷиева вобаста ба солимии занону кӯдакон сухан карда,  мушкилоти соҳаро таъкид дошт.  Дар чорабинӣ намояндагони Маҷлиси Олии Ҷумҳурии Тоҷикистон, Ташкилоти умумиҷаҳонии тандурустӣ, мутахассисони варзидаи соҳаи тандурустӣ, вазорату идораҳо ва ташкилоти байналмилаливу ҷамъиятӣ ширкат намуданд.
Дар чорабинӣ муаррифии мавзӯъҳои судманд, аз ҷумла «Дастовардҳои кишвар ва мушкилоти ҷойдошта дар беҳдошти солимии модару кӯдак», «Таҳияи барномаҳо оид ба ташаккули тарзи ҳаёти солим барои мактаббачагон», «Маблағгузориҳои дарозмуддат  барои саломатии модар ва наслҳои оянда» садо доданд. Ҳамчунин, намояндаи Кумитаи кор бо занон ва оилаи назди Ҳукумати Ҷумҳурии Тоҷикистон М.Шамсиева оид ба ҳалли масъалаҳои солимии занон сухан гуфта, аз мушкилот дар самти ҳифзи сиҳатии модару кӯдак ёдовар шуд.