Намоишгоҳи байналмиллалии таълимӣ — туристӣ дар Қурғонтеппа

Душанбе, 21.11.2015. (АМИТ «Ховар») -Дар Кохи Ватани шаҳри Қурғонтеппа 17-умин намоишгоҳи байналмиллалии таълимӣ — туристӣ ва инноватсионӣ (НБТТИ — 2015) баргузор гардид. Дар чорабинӣ намояндагони ТҶҶ Созандагони Ватан, Донишгоҳи давлатии Қӯрғонтеппа ба номи Н.Хусрав, коллеҷҳои тиббӣ ва омӯзгорӣ, хонандагони синфҳои болоии муассисаҳои таҳсилоти миёнаи умумии шаҳр иштирок доштанд. Зикр шуд, ки Ширкати муштараки байналмиллалии Тоҷикистон-Малайзия ТМ- International тибқи дастури Дастгоҳи иҷроияи Президенти Ҷумҳурии Тоҷикистон тасмим гирифтааст бо дастгирии Ҳукумати Ҷумҳурии Тоҷикистон, Палатаи савдо ва саноати Ҷумҳурии Тоҷикистон, Вазорати маориф ва илми Ҷумҳурии Тоҷикистон ва дигар кумитаву идораҳо 17 — умин намоишгоҳи байналмиллалии таълимиро дар манотиқи мухталифи кишвар доир намояд. Намоишгоҳи мазкур ба толибилмон ва хоҳишмандон имкон медиҳад, ки аз тарзи таҳсилу омӯзиш дар донишгоҳҳои кишварҳои хориҷӣ иттилои бештар пайдо намоянд. Дар намоишгоҳ равияи илмҳои дақиқ, технологияи информатсионӣ, соҳаи муҳандисию  архитектура фаҳмонида мешавад, зеро ҷумҳурии мо ба мутахассисони чунин соҳаҳо ниёз дорад.