Нуробод: Ливои бахту саодат ҳамвора парафшон бод!

Нуробод, 25.11.2015. (АМИТ «Ховар»).-Дар даромадгоҳи  шаҳраки  Дарбанди ноҳияи Нуробод Парчами давлатии ҷумҳурӣ дар баландии 35 метр афрохта шудааст, ки дирӯз дар назди  он  зери унвони «Парафшон бод Парчамат, Тоҷикистони азиз » бо иштироки зиёда аз 2000  ҷавону  сокинони ноҳия бо парчамчаҳои миллӣ роҳпаймоӣ баргузор гардид.
    Ҳамчунин дар назди бинои Мақомоти иҷроияи ҳокимияти давлатии ноҳия  бо иштироки  раиси ноҳия Дӯстзода Ҳасан Тағдир, роҳбарияти ташкилоту муассисаҳо, ҷавонон  ва сокинони ноҳия  маҷлиси тантанавӣ доир шуд.  Дар ҷамъомад Суруди миллӣ садо дод ва раиси ноҳия сокинони ноҳияро бо ин рӯзи фаромӯшнашаванда  табрик намуда, гуфт, ки: «Парчами миллии мо нишона аз таърихи  ҳазорсолаи халқи тоҷик аст.  Тибқи маълумоти сарчашмаҳо  қавмҳои ориёӣ  ҳанӯз аз давраҳои бостон оини парчамсозию парчамдориро  гиромӣ медоштанд.  Бинобар ин  арҷгузорӣ ба муқаддасоти миллӣ, Сарқонун, Нишон, Парчам ва Суруди миллӣ бояд дар миёни мардум  ва пеш аз ҳама,  наврасону ҷавонон ҳамчун рамзи нангу номус  ва шарафи миллӣ  вусъат гирад».