Қодири Қосим иқтидор ва имкониятҳои сармоягузории Тоҷикистонро дар ҳафтаи Авруосиё дар Париж муаррифӣ кард

Душанбе, 26. 11. 2015. (АМИТ «Ховар»).-Дар  доираи  ҳафтаи Авруосиё, ки аз 23 то 26 ноябр дар  шаҳри Парижи Ҷумҳурии Фаронса бо иштироки зиёда аз 30 соҳибкори Тоҷикистону Фаронса доир шуд,  Шӯрои соҳибкорони Тоҷикистону Фаронса (Ассотсиатсияи байналмилалии MEDEF) таъсис дода шуда, байни раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим ва роҳбари Ассотсиатсияи байналмилалии соҳибкорони “МЕДЕФ”-и Ҷумҳурии Фаронса Ҷен Бурелле (Jean BURELLE) Ёддошти тафоҳум ба имзо расид.
Ассотсиатсияи байналмилалии MEDEF  соли 1989 таъсис ёфта, яке аз калонтарин намояндагии ташкилоти хусусии Фаронса дар ҷаҳон мебошад. Ассотсиатсияи байналмилалии MEDEF дорои зиёда аз 800 ҳазор  намоянда дар тамоми ҷаҳон мебошад. Зиёда аз 6.700 ширкати Фаронса, ки чун аъзои  Ассотсиатсияи байналмилалии MEDEF дар ҷаҳон фаъолият менамоянд, аз 81 Шӯрои соҳибкорон таҳти роҳбарии 46 менеҷер аз ширкатҳои бузурги байналмилалии  Фаронса мебошанд.  Ассотсиатсияи байналмилалии MEDEF ҳамчун ташкилоти хусусӣ фаъолияти худро бо Бонки ҷаҳонӣ, БАТР, Бонки Осиёии рушд, Бонки Исломии Рушд ва дигар бонкҳои рушд ва созмонҳои байналмилалӣ ба роҳ мондааст.
Қобили зикр аст, ки дар доираи ҳафтаи Авруосиё Форуми соҳибкорони давлатҳои СҲИР, вохӯрии соҳибкорони Тоҷикистону Фаронса (Ассотсиатсияи соҳибкорони МЕДЕФ), мулоқоти доираҳои соҳибкорон ва ҳамчунин мулоқоти байни вазорату идораҳои кишварҳои ширкаткунанда  баргузор гардид. 
Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим дар назди соҳибкорони бонуфузи Фаронса оид ба  иқтидор ва имкониятҳои сармоягузории Ҷумҳурии Тоҷикистон маърӯза намуд.