«Ҷойгоҳи парчам дар худшиносии миллӣ»-ҳамоиши илмӣ

Душанбе, 20.11.2015. (АМИТ «Ховар»).-Имрӯз дар Пажуҳишгоҳи илмӣ-татқиқотии фарҳанг ва иттилооти Вазорати фарҳанги Ҷумҳурии Тоҷикистон таҳти унвони «Ҷойгоҳи парчам дар худшиносии миллӣ» ҳамоиши илмӣ баргузор мегардад. Бояд гуфт, ки ҳамоиши мазкур ба ифтихори  24 солагии рӯзи Парчами миллӣ  бахшида шудааст. 
Дар ҳамоиш  олимону донишмандон ва донишҷӯёни Донишкадаи давлатии фарҳанг ва санъати Тоҷикистон ба номи М. Турсунзода  ширкат меварзанд.  
Ёдовар мешавем, ки дар ҳамоиши илмӣ вобаста ба мавзӯъҳои «Вижагиҳо ва ифодаҳои рамзии Парчами тоҷикон дар давраҳои мухталифи таърихи», «Шарҳи рамзҳои Парчами миллӣ», «Парчам  рамзи ваҳдати миллӣ дар замони истиқлол», «Тараннуми Парчами миллӣ дар адабиёти тоҷик»  маърӯзаҳо садо медиҳанд.  
Дар поёни ҳамоиши илмӣ мусаввара ва китобҳои тозанашр ба намоиш гузошта хоҳанд шуд.