Қонунҳои намунавии марбут ба муҳоҷират ба парлумонҳои миллӣ пешниҳод гардиданд

Душанбе, 28.11.2015.(АМИТ “Ховар”).-Дар ҷаласаи чилу сеюми Ассамблеяи байнипарлумонии /АБ/ кишварҳои Иттиҳоди Давлатҳои Мустақил /ИДМ/ якчанд қонуни намунавӣ марбут ба муҳоҷират, аз қабили “Оид ба муҳоҷират”, “Оид ба муҳоҷирати захираҳои меҳнатӣ”, “Оид ба ҳамкории иттилоотӣ дар соҳаи муҳоҷират” қабул гардида, барои  баррасӣ ба парлумонҳои миллӣ пешниҳод гардиданд. Бояд тазаккур дод, ки ин қонунҳои намунавӣ  зимни баррасии масъалаи «Муҳоҷирати байналмилалӣ: проблема, ҳамкорӣ ва дурнамои рушд», ки яке аз масъалаҳои муҳими ҷаласаи чилу сеюми АБ  кишварҳои ИДМ маҳсуб мешуд, қабул гардиданд.
 Дар ҷаласа Валентина Матвиенко -раиси Шӯрои Федератсияи Маҷлиси Федералии Федератсияи Русия аз нав раиси АБ кишварҳои ИДМ  интихоб гардид.
Дар ассамблея ҳамзамон лоиҳаи тавсияҳо оид ба ворид намудани тағйиру иловаҳо ва танзими қонунгузории миллии кишварҳои  АБ ИДМ, «Барномаи дурнамои қонунгузории намунавӣ дар ИДМ барои солҳои 2016-2020»  мавриди баррасӣ қарор гирифтанд. Дар ҷаласаи чилу сеюми АБ давлатҳои ИДМ ҳайати парлумонии Ҷумҳурии Тоҷикистон таҳти роҳбарии Маҳмадсаид Убайдуллоев -раиси палатаи болоии Парлумони кишвар иштирок намуд.   
Дар фарҷом иштирокдорони ассамблея ба унвони парлумонҳои кишварҳои ҷаҳон   “Изҳорот оид ба ҳамкории дастаҷамъона дар мубориза бар зидди терроризми байналмилалӣ” қабул карданд.