“Парчам рамзи соҳибдавлатист”-конфронси илмӣ

Душанбе, 18.11.2015. (АМИТ «Ховар).-Дар Шӯрои иттифоқҳои касабаи вилояти Суғд  бо ташаббуси кумитаи вилоятии иттифоқи касабаи кормандони маориф ва илм бахшида ба Рӯзи парчам конфронси илмӣ таҳти унвони “Парчам рамзи соҳибдавлатист” баргузор гардид.
Раиси Шӯрои иттифоқҳои касабаи вилоят Тоҳир Ғафуров гуфт, ки: «7 сол инҷониб дар кишвари тозаистиқлоламон Рӯзи Парчам бо шаҳомати хосса таҷлил мегардад.  Парчами давлатиро, ки рамзи давлатдории  миллати тоҷик аст, бояд эҳтиром кард, яъне эҳтиром  гузоштан ба  Парчам ҳамчун рамзи давлатӣ ин эҳтиром ба худ, ба мавқеъ, ҷойгоҳ, ҳамсоя,  ҷомеа, таърих, фарҳанги гузашта, муборизаҳоест, ки тавассути  он мо имрўз ба истиқлолият  расидаем, ин як навъ ҷоннисорӣ, ҷонбозист ва    арзишҳоест, ки ҳудуду паҳно надоранд. Он чизе, ки муқаддас  аст, наҷиб аст, сатҳи аз ҳама олӣ аст, онро бояд дўст дошт ва Парчами тоҷик ва кулли муқаддасоти  миллӣ шоистаи дўстдоштанист».
Муовини аввали раиси Ҳаракати ҷамъиятии ваҳдати миллӣ ва эҳёи Тоҷикистон дар вилояти Суғд, профессори кафедраи таърихи умумии ДДХ  Абдуҷалил Бобокалонов бобати нақши таърихии Иҷлосияи 16-уми Шӯрои Олӣ дар қабули Парчам ва дотсенти кафедраи таърихи ватани ДДХ  Шавкат Шарипов дар мавзӯи “Аз таърихи парчам ва парчамдорӣ” маърӯза карданд.