«Парчами Тоҷикистон- рамзи истиқлолият»-семинари илмӣ

Душанбе, 21.11.2015. (АМИТ «Ховар»). -«Ҷашни Парчам аз зумраи ҷашнҳое мебошад, ки имрӯз симои Тоҷикистонро ҳамчун давлати соҳибистиқлол, муқтадир, бофарҳанг ва соҳиби тамаддуни бой дар ҷаҳон муаррифӣ менамояд. Таҷрибаи гузаштагони миллати тоҷик агар аз як тараф боиси ифтихори халқи тоҷик бошад, аз тарафи дигар асоси ҳастӣ ва пойдории давлатдории ин миллати соҳибтамаддун аст»,- гуфта шуд имрӯз зимни баргузории семинари илмӣ- назариявӣ таҳти унвони «Парчами Тоҷикистон- рамзи истиқлолият» бахшида ба Рӯзи парчами давлатӣ дар  Донишгоҳи давлатии Маскав ба номи М.В Ломоносов.
Дар семинари илмӣ- назариявӣ устодону донишҷӯёни донишгоҳ иштирок намуда, доир ба «Таърихи пайдоиши Парчами давлатӣ», «Таърихи парчам дар асрҳои гузаштаи халқи тоҷик то солҳои 1924» ва «Рукнҳои Парчами Тоҷикистон ва рамзи он» маърӯзаҳо аз тарафи донишҷӯён шунида шуданд. 
Ҳамчунин дар семинар гуфта шуд, ки Парчам як рамзи хосаи истиқлолият, ватандорӣ, соҳибдавлатӣ ва рамзи ҳастии миллат буда, моро мебояд, ки аз Парчами давлатии худ ифтихор дошта бошем ва онро ҳамчун нишони давлатдории миллӣ, озодӣ ва истиқлолияти Ватан чун сарвати гаронбаҳо ҳифз намоем.