Раиси Федератсияи чавгони ҶИЭ Ҳамза Элхонизода ба Суғд омад

Душанбе, 18.11.2015. (АМИТ «Ховар).- Дирӯз, 17 ноябр раиси Федератсияи чавгони Ҷумҳурии Исломии Эрон Ҳамза Элхонизода ба вилояти Суғд омад.
Зимни сафар ҳайати меҳмонон аз Варзишгоҳи чавгони аспӣ ва Муассисаи давлатии мактаби махсуси варзишии бачагону наврасон оид ба чавгон дидан карда, аз Қасри Арбоб, Маҷмааи фарҳангию таърихии «Қалъаи Хуҷанд», Регистони Панҷшанбе, Минтақаи озоди иқтисодии «Суғд» боздид менамоянд.
Зимнан, ҳини сафари раиси вилоят ба ҶИЭ бо ҳузури Абдураҳмон Қодирӣ ва масъулини Федератсияи чавгони Ҷумҳурии Исломии Эрон тафоҳумномае дар хусуси омӯзиши бозии чавгон ба тоҷикон ба имзо расид ва сипас як гурӯҳ ҷавонони тоҷик озими Эрон шуда, бо нозукиҳои ин бозии суннатӣ шинос гардиданд.
Бо дастгирии раиси вилоят ҳоло дар вилояти Суғд Варзишгоҳи чавгони аспӣ ва Муассисаи давлатии мактаби махсуси варзишии бачагону наврасон оид ба чавгон фаъолият дорад, ки дар он садҳо нафар ҷавонон ин бозии миллиро меомӯзанд.