Рамзҳои Парчами давлатӣ: Озодию иқбол ва сарсабзию хуррамӣ

Душанбе, 24.11.2015.(АМИТ «Ховар»). — Имрӯз, 24 ноябр мардуми тоҷик ҷашни яке аз рукнҳои  муқаддаси миллӣ-Рӯзи Парчами давлатии Ҷумҳурии Тоҷикистонро бо шукуҳу шаҳомат дар фазои амну субот, ваҳдату ҳамраъйӣ  ва умед ба фардои неку дурахшон  таҷлил намуданд. Парчами давлатӣ  рамзи истиқлолияти давлатии кишварамон буда, матои росткунҷаест, ки дар рӯяш  се рахи ранга ба таври уфуқӣ — ранги сурх, сафед ва сабз ҷой гирифтаанд. Ранги сурхи Парчами давлатӣ  рамзи ҷоннисорию муборизаи халқ барои озодӣ ва истиқлолият, ранги сафед бахту иқболи сафед, покизагӣ ва ранги сабз саъю кӯшиш ва заҳмату меҳнати халқ баҳри сарсабзию хуррамии Ватан аст. Дар мобайни парчами давлатӣ бо зарҳал рамзи тоҷ тансиқ шуда ва дар болои он ҳафт ситора дар шакли нимдоира тасвир шудааст, ки рамзи соҳибистиқлолии Ҷумҳурии Тоҷикистон мебошад. 
Бояд тазаккур дод, ки соли 2011 дар остонаи ҷашни 20-солагии Истиқлолияти давлатии Ҷумҳурии Тоҷикистон  дар пойтахти кишвар дар маросими ботантана Парчами давлатӣ бо баландии 165 метр парафшон гардида, ҳамчун баландтарин парчам дар ҷаҳон ба китоби «Рекордҳои  Гиннес»  ворид  шуд. Дар атрофи баландтарин Парчами давлатӣ Боғи парчами миллӣ бунёд шудааст. Боғи парчами миллиро гулу себарга ва дарахтони ороишию сояафкан, инчунин фаввораю ҳавзҳо шукӯҳи шаҳомати хосса бахшида, он ба  сайргоҳи сокинону меҳмонони Тоҷикистон табдил гардидааст.