Садамаҳои нақлиётии марговар дар роҳҳои кишвар

Душанбе, 23.11.2015. (АМИТ “Ховар”).-22 ноябри соли равон ронандаи мошини тамғаи “Тайота-Кемрӣ”, сокини 35-солаи ноҳияи Ҳисор, ҳангоми ҳаракат аз самти ноҳияи Ҳисор ба самти шаҳри Душанбе, дар ҳудуди деҳаи Айнӣ, ҷамоати деҳоти Навобод бехатарии ҳаракати роҳро таъмин карда натавониста, пиёдагарди хурдсолро пахш намудааст. Дар натиҷа хурдсол ҷароҳати вазнини ҷисмонӣ бардошта, дар беморхона ба ҳалокат расидааст. 
Ҳамчунин дар ин рӯз, ронандаи мошини тамғаи “ГАЗ-2705”, сокини 32-солаи шаҳри Хуҷанд, ҳангоми ҳаракат бо роҳи мошингарди маҳаллаи Пахтакор, дар рӯ ба рӯи маҳаллаи Г.Раҳимови шаҳри Хуҷанд, бехатарии ҳаракати роҳро таъмин карда натавониста, духтарчаи дусолаи сокини шаҳри Хуҷандро пахш намудааст. Дар натиҷа духтарчаи хурдсол ҷароҳати вазнини ҷисмонӣ бардошта, дар беморхона ба ҳалокат расидааст. 
Ронандаи мошини тамғаи “Мерседес-Бенс”, сокини 33-солаи ноҳияи Хуросон, ҳангоми ҳаракат аз самти ноҳияи Ҷ.Румӣ ба самти шаҳри Қурғонтеппа, дар ҳудуди деҳаи Қизил-Шарқ аз уҳдаи идораи воситаи нақлиёт набаромада, ба қисми пеши мошини тамғаи “Опел-Астра” таҳти идораи ронанда, сокини 51-солаи шаҳри Сарбанд бархӯрдааст. Дар натиҷа ронандаи мошини “Опел-Астра”, ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.