Сарқонун-санади тақдирсозе, ки тамомияти арзии кишвари моро таъмин мекунад

Рашт, 4.11.2015. (АМИТ «Ховар»).-  Дар Қасри фарҳанги ноҳияи Рашт бахшида ба 21-умин солгарди қабули Сарқонуни Ҷумҳурии Тоҷикистон  бо иштироки  раиси ноҳия  Лоиқзода Қаноатшои Холиқ, роҳбарони мақомоти ҳифзи ҳуқуқ, фаъолон, роҳбарони ташкилоту муассисаҳо, донишҷӯён ва аҳли ҷамъияти ноҳия маҷлиси тантанавӣ баргузор гардид. Раиси ноҳия  Лоиқзода Қаноатшои Холиқ   аҳли нишаст ва сокинонони ноҳияро бо рӯзи Сарқонуни   кишвар табрик намуда, гуфт, ки қабули Сарқонун-  ин санади тақдирсоз барои аз байн бурдани хавфе, ки ба истиқлолияти давлатӣ,  тамомияти арзии кишвар ва ягонагии миллат  таҳдид мекард, шароитҳои зарурии ҳуқуқӣ муҳайё намуда, роҳи сулҳу суботи боэътимодро боз намуд.  
Иштирокдорони вохӯрӣ изҳор карданд, ки  сокинони ноҳияи Рашт  чун дигар мардуми манотиқи  кишвар бо дарки масъулият дар таъмини волоияти қонун, рушди минбаъдаи ноҳия ва Тоҷикистони соҳибистиқлоламон саҳми арзандаи хешро  мегузоранд.
Бахшида ба рӯзи Сарқонуни Ҷумҳурии Тоҷикистон дар муассисаҳои таҳсилоти умумӣ, коллеҷҳо, ҷамоатҳои шаҳраку деҳоти ноҳия бо иштироки фаъолон ва зиёиёни ноҳия вохӯрӣ ва  суҳбатҳои судманд ҷараён доранд.