Соҳибони медалҳои биринҷӣ дар даври охирини мусобиқот маълум мешаванд

Душанбе, 18.11.15. (АМИТ «Ховар»). — 17  ноябр бозиҳои даври 17 — уми мусобиқоти  Тоҷикистон  оид ба  футбол  байни дастаҳои  лигаи олӣ баргузор  шуданд.
Дар   шаҳри  Ваҳдат  вохӯрии дастаи  «Хайр»  бо  дастаи «Равшан» — и  шаҳри  Кӯлоб бо  ҳисоби  0:0 мусовӣ  шуд. Дастаи  «Истиқлол» — и   шаҳри  Душанбе, ки пеш  аз  муҳлат  қаҳрамони  кишвар  гардид,  дар  майдони  худ  клуби «Барқи  тоҷик» — ро  бо  ҳисоби  3:1  мағлуб  сохт.
 Дастаи  «Хуҷанд» дар  варзишгоҳи  «20 — солагии  истиқлолияти   Тоҷикистон» дастаи «Парвоз» — и  ноҳияи Бобоҷон  Ғафуров бо  ҳисоби  1:0 мағлуб  сохт. Вохӯрии  дастаҳои «Регар — ТадАЗ» — и  шаҳри  Турсунзода  ва  «Далерон» — и  шаҳри  Истаравшан бо  ҳисоби 6:0 ба  фоидаи футболбозони  шаҳри  Турсунзода  анҷом  ёфт.  Дастаи «Вахш»  — и  шаҳри  Қӯрғонтеппа  дастаи  ССКА «Помир» — и   шаҳри  Душанберо бо  ҳисоби 4:2 мағлуб  сохт.
Вохӯриҳои  даври  хотимавии  мусобиқот 22  ноябр  баргузор гардида,  тақдири  медалҳои биринҷӣ баъди қувваозмоии  байни  дастаҳои «Равшан»  ва «Регар — ТадАЗ» ҳал  мешавад.