СУС: Баҳси шароити гузаронидани ислоҳот дар савдо ва чораҳои дастгирӣ

Душанбе, 30.11.2015 (АМИТ «Ховар»).- Семинари омӯзишӣ оид ба масъалаҳои  Созмони Умумиҷаҳони Савдо (СУС), ки 1 декабр дар Душанбе баргузор мегардад, барои дарки боз ҳам бештар ва татбиқи  дастурҳои бисёрҷонибаи савдо дар соҳаи кишоварзӣ ва ҳамчунин уҳдадориҳои савдо бо маҳсулоти кишоварзӣ, ки аз ҷониби мамлакат барои аъзо шудан дар СУС қабул шудаанд, мусоидат хоҳад кард.
Дар ҷамъомад намояндагони вазоратҳо ва идораҳои масъул, ташкилоти давлатии санитарӣ ва  фитосанитарӣ, институтҳои илмию тадқиқотӣ, ки барои татбиқи сиёсати савдо ва кишоварзӣ мутасаддӣ шудаанд ва ҳамчунин намояндагони бахши хусусӣ дар соҳаи агросаноатӣ ширкат хоҳанд кард.
«Умедворем, ки семинари мазкур барои баҳси шароитҳои гузаронидани ислоҳот дар савдо ва чораҳои дастгирие, ки барои  узвият дар СУС барои мамлакат имтиёзҳои бештарро дар рушди соҳаи кишоварзӣ ва бехатарии амнияти озуқаворӣ  фароҳам меоранд, мусоидат мекунад», — гуфт Виорел Гутсу, намояндаи Ташкилоти озуқа ва кишоварзии СММ дар Ҷумҳурии Тоҷикистон.
Интизор меравад, ки баъд аз анҷоми семинар иштирокдорони он шартномаҳои СУС ва уҳдадориҳои махсуси мамлакатро дар соҳаи кишоварзӣ беҳтар дарк намуда, аз онҳо мунтазам истифода хоҳанд бурд. Иштирокдорон  ба таҳқиқи масъалаҳои имконпазир ва имкониятҳои соҳаи кишоварзӣ, ки баъд аз аъзо шудан ба СУС ба вуҷуд меоянд,  қодир мешаванд. Онҳо масъалаҳои татбиқ ва беҳтар намудани қоидаҳое, ки системаи  санитарӣ ва  фитосанитарӣ, ҳамчунин сиёсати кишоварзиро танзим мекунанд, аз худ менамоянд.