Таъсиси Шӯрои собиқадорони ҲХДТ дар Исфара

Исфара, 19.11.2015. (АМИТ «Ховар»).-Дар шаҳри Исфара  аз ҳисоби 25  собиқадори соҳибтаҷриба ва барӯманди ҳизб Шӯрои собиқадорони Ҳизби Халқии Демократии Тоҷикистон таъсис дода шуд, ки минбаъд ҳамчун мақоми ихтиёрӣ, ҷамъиятӣ ва ёрирасон фаъолияти хешро роҳандозӣ хоҳад кард. Тавре ки ба АМИТ “Ховар” аз бахши кумитаи вилоятии ҲХДТ дар Суғд иттилоъ доданд, ҳадаф аз таъсиси Шӯрои мазкур арҷ гузоштан ба фаъолияти ибратомӯзи бисёрсола, истифодаи таҷрибаву малака ва кордонии собиқадорони Ҳизби Халқии Демократии Тоҷикистон барои такмилу вусъати корҳои ҳизбӣ, баланд бардоштани обрӯю эътибори ҳизб, тарбияи аъзои ҷавони ҳизб дар руҳияи баланди ватандӯстӣ ва садоқатмандӣ ба Ҳизби Халқии Демократии Тоҷикистон, инчунин ҳимояи ҳуқуқу манфиатҳои қонунии собиқадорони ҲХДТ маҳсуб мешавад. 
Интизор меравад, ки шӯрои мазкур ҷиҳати таблиғу ташвиқ ва татбиқи ғояҳои созанда ваҳадафҳои барномавии ҳизб, омода намудани тавсия ва пешниҳодҳои судманд ҷиҳати таъмини самаранокии фаъолият, дарёфти роҳи ҳаллу фасли масъалаҳои дохилиҳизбӣ ва ҳам дар пешбурди корҳои мафкуравию фаҳмондадиҳӣ дар байни аҳолӣ саҳми муассири худро хоҳад гузошт.