Варзишгарони Муъминобод 99 медал ба даст овардаанд

 Муъминобод,  28.11.2015. (АМИТ «Ховар»). -Абдулло Раҷабов, мудири бахши ҷавонон, варзиш ва  сайёҳии ноҳияи Муъминобод дар мавриди самти фаъолияташон гуфт, ки дар ноҳия як мактаби варзишии кӯдакон ва наврасон  фаъолият дорад ва он аз 10 шуъба, 15 мураббӣ, 32 гурӯҳ  ва 283 варзишгар иборат аст. 
Дар ин муддат дар ноҳия  зиёда аз  54  мусобиқаи гуногуни варзишӣ  гузаронида шуд.  Дар давраи ҳисоботӣ варзишгарони ноҳия дар мусобиқаҳои вилоятӣ, ҷумҳуриявӣ  ва байналмилалӣ  ширкат варзида,  сазовори 99 медал,  аз ҷумла 25 медали тилло, 17 нуқра ва  57 медали биринҷӣ гардиданд. Бо мақсади  пешгирии ҳама гуна  амалҳои номатлуби  ифротгароӣ  миёни ҷавонон ва   шомилшавии онҳо  ба ҳизбу ҳаракатҳои  ифротгаро  аз ҳисоби ҷавонони  фаъоли ноҳия  гурӯҳҳои таблиғотӣ  таъсис  ёфта, бо усули «Хона ба хона»  дар деҳаҳо, маҳаллаҳо  ва ҷамоатҳои шаҳраку  деҳот  корҳои фаҳмондадиҳӣ ҷараён доранд.