Ёвон: прокуратура мубориза бо терроризмро тақвият мебахшад

Ёвон, 19.11.2015. (АМИТ «Ховар»).-Прокуратураи ноҳияи Ёвон  дар ҳамбастагӣ бо дигар   мақомоти ҳифзи ҳуқуқи ноҳия  баҳри мубориза бар зидди терроризм, ифротгароӣ, муомилоти ғайриқонунии  маводи нашъадор, таъмини амнияти давлат  ва ҷомеа  пайваста тадбир меандешад. Кормандони прокуратураи ноҳия пешгирии  ҷиноятҳои террористӣ  ва экстремистӣ, шомилшавии ҷавонону  наврасон  ба ҳизбу ҳаракатҳои  ифротгароро  самти муҳими  фаъолият қарор дода, барои ташвиқу тарғиби  қонунгузории ҷорӣ, ки пешгирии ҳолатҳои  номбурдаро  ба танзим медарорад, дар байни аҳолӣ  ва коллективҳои  меҳнатӣ вохӯриву суҳбатҳо  гузаронида истодаанд. Ба иттилои   прокуратураи ноҳияи Ёвон  дар  ҷамотҳои шаҳраку деҳоти Даҳана,  Х. Ҳусейнов,  Ҳаёти нав ва Ёвон  вохӯриҳо барои фаҳмонидани  мафҳум ва моҳияти  қонунгузорӣ  дар бораи  мубориза бар зидди  терроризм  ва экстремизм, пешгирии содиршавии чунин ҷиноятҳо баргузор шуда, ба иштирокдорон роҳҳои пешгирии  ин ҷиноятҳо фаҳмонида шуданд. Инчунин ҳангоми суҳбатҳо  ба иштирокдорони вохӯриҳо  оқибатҳои  амалиёти  мусаллаҳона  ва ҷангҳои харобиовар, ки дар баъзе  давлатҳои минтақаи Осиё ҷой доранд, дар ин давра   авҷ гирифтани  терроризм ва экстремизм ва мақсади намояндагони  гурӯҳҳои ифротгаро барои расидан ба ҳадафҳои  ғаразноки сиёсии хеш бо истифода аз номи  дини мубини ислом ва ба фаъолияти  ғайриқонунии худ ҷалб намудани   ҷавонону наврасон фаҳмонида мешаванд.
Бо ташаббуси прокуратураи  ноҳияи Ёвон  нақшаи вохӯрии роҳбарони аввали мақомоти ҳифзи ҳуқуқи ноҳия  ва мақомоти иҷроияи ҳокимияти давлатӣ бо фаъолон, аҳли ҷамоат, аҳолии ноҳияи Ёвон оид ба пешгирии ҷиноятҳои экстремистӣ ва террористӣ, шомилшавии шаҳрвандон ба  ташкилоту  гурӯҳҳои ифротгаро, инчунин фаҳмонидани сиёсати пешгирифтаи  Ҳукумати Ҷумҳурии Тоҷикистон дар семоҳаи  чоруми  соли 2015   тартиб дода шуд, ки дар асоси нақшаи  номбурда 24 октябри соли 2015 вохӯрии  роҳбарони аввали мақомоти ҳифзи ҳуқуқи ноҳия, раиси ноҳия бо  фаъолон, раисони деҳаҳо, имомхатибон ва роҳбарони ташкилоту муассисаҳо баргузор  шуд.
Мувофиқи иттилои роҳбарияти прокуратураи ноҳияи Ёвон  то имрӯз нисбат ба 5 сокини ноҳия барои ҷиноятҳои  экстремистӣ  ва террористӣ  парвандаҳои ҷиноятӣ оғоз шуда, онҳо ба ҷавобгарии ҷиноятӣ  кашида шуданд.