18 муассисаи таҳсилоти миёнаи касбӣ соли 2016 имтиҳонро тариқи ММТ месупоранд

      Душанбе, 19.12.2015. (АМИТ «Ховар»).-Маркази миллии тестии назди Президенти Ҷумҳурии Тоҷикистон айни замон барои 85 000 довталаб маводҳои омӯзишиву таблиғотиро омода кардааст. Маҳмадалӣ Раҳмонов-муовини директори ММТ ба АМИТ «Ховар»  иттилоъ дод, ки дар баробари 8 муассисаи  таҳсилоти касбӣ, ки соли 2015 тавассути низоми марказонидаи тестӣ имтиҳон қабул карданд, инчунин дар соли 2016 боз 18 муассисаи таҳсилоти миёнаи касбӣ ба ин низом шомил гардиданд ва дар маҷмӯъ 30 муассисаи олии касбӣ ва 26 муассисаи таҳсилоти миёнаи касбӣ ба ин низом шомил гардиданд. 
       Маҳмадалӣ Раҳмонов ҳамчунин иттилоъ дод, ки дар назар аст рӯзҳои 13, 14 ва 15 январи соли 2016 корҳои фаҳмондадиҳӣ  барои намояндагони 68 шаҳру ноҳия гузаронида шуда, инчунин охири моҳи январ барои намояндагони ҳамаи муассисаҳои  таълимии шаҳру навоҳии кишвар ва моҳи феврал барои хатмкунандагони муассисаҳои таълимӣ  вохӯриҳо доир мегарданд.
     Ёдовар мешавем, ки бақайдгирии довталабон дар соли таҳсили 2016-2017 аз моҳи марти соли 2016 оғоз гашта то 15 апрел  идома меёбад ва  аз 16-ум то 30-юми апрел давраи  азнавбақайдгирӣ гузаронида мешавад.