Агентии хизмати давлатии назди Президенти ҶТ: Эмомалӣ Раҳмон — сулҳовару ҷоннисори миллат аст

Душанбе, 17.12.2015. (АМИТ «Ховар).-Дар Донишкадаи идоракунии давлатии назди Президенти Ҷумҳурии Тоҷикистон дар якҷоягӣ бо Агентии хизмати давлатии назди Президенти Ҷумҳурии Тоҷикистон бо иштироки ҳайати кормандон,  шунавандагони курси такмили ихтисос барои масъулини ҷамоатҳои шаҳрак ва деҳоти шаҳр ва ноҳияҳои ҷумҳурӣ оид ба рушди иҷтимоӣ ва робита бо ҷомеа, магистрантҳо ва донишҷӯён доир ба ҷонибдорӣ аз қабули Қонуни Чумҳурии Тоҷикистон «Дар бораи Асосгузори сулҳу ваҳдати миллӣ — Пешвои миллат” маҷлиси васеъ баргузор гардид.  Ректори Донишкада Лутфия Абдулхолиқзода,  директори Агентии хизмати давлатии назди Президенти Ҷумҳурии Тоҷикистон Ҷ.Давлатов ва дигар суханкунандагон роҷеъ ба фаъолият ва садоқату сулҳофаринӣ ва ҷоннисориҳои Сарвари давлат, Президенти кишвар  Эмомалӣ Раҳмон изҳори андеша намуда, якдилона ҷонибдории худро аз қабули қонуни мазкур изҳор намуданд.