Ҳамкории Вазорати маориф ва илми Тоҷикистон бо Ҷумҳурии Кореяи Ҷанубӣ

Душанбе, 15.12.2015. (АМИТ «Ховар»). — “Вазорати маориф ва илми Ҷумҳурии Тоҷикистон ҳамкориро бо Ҷумҳурии Кореяи Ҷанубӣ дар асоси созишнома ва ёддошти тафоҳум, ки байни муассисаҳои таҳсилоти олии касбии Ҷумҳурии Тоҷикистон ва Ҷумҳурии Кореяи Ҷанубӣ ба имзо расидаанд, ба роҳ мондааст”,-гуфт  вазири  маориф ва илми Ҷумҳурии Тоҷикистон Нуриддин Саид зимни мулоқот бо раиси Ҷамъияти дўстии Ҷумҳурии Корея дар кишварҳои Осиёи Марказӣ хонум Ли Ок Рен. 
Бино ба гуфтаи вазир, Донишкадаи давлатии забонҳои Тоҷикистон ба номи Сотим Улуғзода бо Донишгоҳи Кемёни Ҷумҳурии Кореяи Ҷанубӣ, Донишгоҳи (славянии) Русия-Тоҷикистон бо се донишгоҳ-Донишгоҳи тадқиқоти байналмилалии Хангук, Донишгоҳи Эйджоу ва Донишгоҳи забонҳои хориҷии Пусинги Ҷумҳурии Кореяи Ҷанубӣ созишномаҳои ҳамкорӣ ба имзо расонидаанд. 
Ҳоло  дар муассисаҳои таҳсилоти олии касбии Ҷумҳурии Кореяи Ҷанубӣ 67 шаҳрванди Ҷумҳурии Тоҷикистон ва дар муассисаҳои таҳсилоти олии касбии Ҷумҳурии Тоҷикистон 28 шаҳрванди Ҷумҳурии Кореяи Ҷанубӣ ба таҳсил фаро гирифта шудаанд,-зикр гардид дар суханронии ҷонибҳо.-Инчунин мо метавонем дар самти табодули бештари  донишҷўён, баргузор намудани семинару симпозиум ва конфронсҳои муштарак, анҷом додани таҳқиқоти муштараки илмӣ фаъолияти дуҷонибаро ба роҳ монем.