Армуғони солинавии шаҳрдори Хуҷанд ба тарбиятгирандагони мактаб-парваришгоҳ

Хуҷанд, 30.12.2015 (АМИТ «Ховар»). -Дар арафаи соли нави мелодӣ бо ибтикори мақомоти маҳаллии шаҳри Хуҷанд ба бештар аз ду ҳазор шахси ниёзманд, яккаву танҳо ва нафарони имконияташон маҳдуд кумаки яквақта ва туҳфаҳои солинавӣ расонида шуданд.
Тавре ки ба АМИТ “Ховар” аз дастгоҳи раиси шаҳр иттилоъ доданд, дирӯз шаҳрдори Хуҷанд Раҷаббой Аҳмадзода дар чорабинии идонаи солинавӣ дар мактаб-парваришгоҳи махсуси кӯдакони имконияташон маҳдуди маркази вилоят иштирок намуда, онҳоро бо фарорасии соли нави мелодии 2016 табрик гуфта, туҳфаҳои хотиравии солинавӣ супорид.
Сипас барои 250 тарбиятгирандаи мактаб-парваришгоҳи мазкур дастурхони идонаи солинавӣ ороста шуда, аз номи Сарвари давлат ба ҳар яки онон либосҳои гарм ва туҳфаҳои хотиравӣ тақдим гардид.
Дар ин бора ба хабарнигори АМИТ “Ховар” рохбари дастгохи шаҳрдори Хуҷанд Биволида Самадова хабар дод.