Ҷавонони Хатлон: Сиёсати хирадмандонаи Президенти мамлакат Тоҷикистонро дар арсаи ҷаҳонӣ маъруф кард

Қурғонтеппа, 11.12.2015. (АМИТ «Ховар). — Дар Донишгоҳи давлатии  шаҳри Қурғонтеппа  вохӯрии  донишҷӯён бо муовини раиси  вилояти Хатлон  Шерзода  Ситора  Маннон  баргузор гардид. С.Шерзода  зикр намуд, ки имрӯз  бо   дастгирии  роҳбарияти  ҷумҳурӣ ҷавонон  тамоми имкониятҳоро доранд, то соҳиби  касбу  ҳунар шуда,  дар соҳаҳои гуногуни  иқтисоди ҷумҳурӣ  фаъолият намоянд.  С.Шерзода   иқдоми  намояндагони  мардумӣ  барои ба  Сарвари давлатамон Эмомалӣ Раҳмон  додани унвони  «Асосгузори сулҳу ваҳдати миллӣ — Пешвои миллат»-ро  амри зарурӣ  хонда,  аз  хизматҳои роҳбари давлат ба  мардуми Тоҷикистон  ёдовар шуд.  Ҳамзамон  зикр гардид, ки  маҳз  сиёсати хирадмандонаи  Президенти мамлакат  Тоҷикистонро дар арсаи  ҷаҳонӣ  маъруф  кард.
Дирӯз  ҳамчунин дар  конфронс  бахшида  ба  21- солагии  таъсиси  ҲХДТ, ки дар шаҳри Қурғонтеппа  баргузор гардид,  аз заҳматҳои Президенти мамлакат дар  барқарорсозии сулҳу  осоиштагӣ дар  ҷумҳурӣ  сухан  рафт.  Зикр гардид, ки  сиёсати пешгирифтаи Президенти  кишвар  Эмомалӣ Раҳмон  ба  ҷавонон имконият  медиҳад, ки дар ояндаи кишвар  саҳми  худро гузоранд.  Барои таҳсили ҷавонон  имрӯз  дар  ҷумҳурӣ  тамоми  шароит фароҳам оварда  шудааст.      
Чунин  чорабиниҳо  дар Донишкадаи энергетикии  Тоҷикистон дар  Қурғонтеппа,  беморхонаи  вилоятӣ ба  номи Б. Воҳидова  ва  идораи  маорифи  шаҳри Қурғонтеппа  баргузор гардиданд.