Ба омӯзиши ҳунарҳои мардумӣ ҷалб кардани занону духтарон

Хуҷанд, 24.12.2015. (АМИТ «Ховар»). -Дар вилояти Суғд барои иҷрои дастуру супоришҳои Сарвари давлат Эмомалӣ Раҳмон барои рушди ҳунарҳои мардумӣ, аз ҷумла адрасу атласбофӣ тадбирҳои зиёде амалӣ гардиданд, ки он ба раванди эҳё намудани ҳунарҳои мардумӣ ва ҳарчи бештар ба шуғл фаро гирифтани занону духтарон таъсири мусбати худро мегузорад.
Ҳоло дар 101 ҷамоати шаҳраку деҳоти вилоят марказҳои таълимию истеҳсолӣ ташкил  шуда, дар онҳо 316 дастгоҳи адрасу атласбофӣ насб гардиданд.
Бояд зикр намуд, ки дар давоми 11 моҳи соли 2015 мақомоти давлатии шуғли аҳолӣ 27 135 нафар шаҳрвандро ба омӯзиши касбу ҳунар фаро гирифтааст, ки қисмати муайяни он омӯзиши ҳунарҳои мардумиро ташкил медиҳад.
Дар ин давра ба омӯзиши ҳунари қолинбофӣ 1051 нафар, сӯзанидӯзӣ 328, адрасу атласбофӣ 870 нафар, қуроқдӯзӣ 70 нафар, гулдӯзӣ 80 нафар ва зардӯзӣ 132 нафар занону духтарон ҷалб гардиданд.