Баррасии масъалаҳои омодагӣ ба замистон дар Қайроққум

Душанбе, 2.12.2015. (АМИТ «Ховар»).-Дар Мақомоти иҷроияи ҳокимияти давлатии шаҳри Қайроққум машварати корӣ баргузор шуд.
Тавре ки аз мақомоти иҷроияи маҳаллӣ хабар доданд, дар машварати кории назди раиси шаҳр масоили таъмини босифати нақшаи қисми даромади андоз, вусъат додани касбомӯзии занону духтарон, таъсиси муассисаҳои нави илмомӯзӣ, ба монанди литсей, мактабҳои хусусӣ, таъмини зинаҳои моддӣ — техникии муассисаҳои таълимӣ, самаранок истифода бурдани маблағҳои буҷетӣ ва камкунии қарзи бақияи андоз  баррасӣ шуданд.
Дар ҷаласа раиси шаҳр Матлубахон Амонзода аз масъулин камбудию норасоӣ ва мушкилоти ҷойдоштаро пурсон шуда, раисони ҷамоати шаҳракҳо ва роҳбарони соҳаҳои марбутаро барои таъмини саривақтии самаранокии самтҳои фаъолият дар ҷамъбасти соли 2015, муташаккилона гузаронидани маъракаи обуна ба матбуоти даврӣ ва  омодагии комил ба давраи  зимистон ва амсоли инҳо муваззаф намуд.