Боздиди Р. Раҳимзода аз сохтмони бинои шуъбачаи минтақавии Бартанг

  Душанбе, 14.12.2015. (АМИТ «Ховар) — Вазири корҳои дохилӣ генерал-лейтенанти милитсия Раҳимзода Рамазон Ҳамро дар доираи сафари корӣ дар вилояти Бадахшон аз ҷараёни корҳои ободонию созандагии бинои нави шуъбачаи минтақавии Бартанг боздид ба амал оварда, ба масъулин таъкид кард, ки ба сифати корҳои сохтмонӣ аҳамияти ҷиддӣ дода, ҷараёни созандагию бунёдкориро вусъат бахшанд.
                Мавриди зикр аст, ки бинои шуъбачаи минтақавии Бартанг кӯҳна буда, дар ҳолати фарсудагӣ қарор дошт. Бинобар ин, роҳбарияти Вазорати корҳои дохилӣ тасмим гирифтанд, ки барои нозирони минтақаи Бартанг бинои нави дуошёнаи ба талаботи замона ҷавобгӯ ва бо тамоми шароит муҷаҳҳазро  бунёд кунанд
       Ҳоло корҳои сохтмонӣ дар минтақаи мазкур босуръат ҷараён дошта, сохтмончиён бо масолеҳи зарурӣ таъмин мебошанд. 
           Вазири корҳои дохилӣ бо нозирони минтақавӣ ҳамсуҳбат шуда, таъкид намуд, ки кормандони милитсия бояд ҳамеша ва дар ҳама ҳолат дар паҳлӯи мардум бошанд ва дар бартарафсозии оқибатҳои офатҳои  табиӣ ва дигар мушкилоти онҳо кумаку дастгирии худро дареғ надоранд.