Бунёди коргоҳи истехсоли аробачаи маъюбӣ дар Хуҷанд

 Хуҷанд, 3.12.2015. (АМИТ «Ховар»).- Дар соли 2016 дар маркази Суғд- шаҳри Хуҷанд бунёди коргоҳи истеҳсоли аробачаи маъюбӣ дар назар аст.  Тавре ки ба АМИТ “Ховар”  масъулин аз раёсати ҳифзи иҷтимоии аҳолии вилоят иттилоъ доданд, бо назардошти талаботи зиёди шахсони ба ҳаракати мустақил имконияташон маҳдудбуда, яъне  маъюбони роҳнараванда ва ҳамзамон шахсони ба дасту пои сунъӣ заруратдошта, дар моҳи апрел соли 2016 тасмим аст бо ибтикори ташкилоти Ҳилоли Ахмари Тоҷикистон ва бахши суғдии он, бо ҳамдастии мақомоти вилояти Суғд ва маблағгузории ширкати чинӣ дар шаҳри Хуҷанд ба маблағи 80 ҳазор доллари амрикоӣ коргоҳи протезӣ-артопедӣ ва аробачаи маъюбисозӣ бунёд  хоҳад шуд. Коргоҳи мазкур ғайр аз сохтани аробачаҳои маъюбӣ, ба таъмиру фурӯши кисмҳои эҳтиётии он ва сохтану шинонидани даступои сунъӣ низ машғул хоҳад шуд.
        Дар вилоят наздик ба 80 маъюб барои шинонидани дасту пои сунъӣ эҳтиёҷ дорад. Ҳоло дар вилоят беш аз 56 ҳазор маъюб дар қайди расмӣ буда, 15 500 нафараш маъюби гурӯҳи 1 ва 3 ба ҳисоб рафта, ҳамасола ба чунин шахсони имконияташон маҳдуд беш аз 100 аробача такдим  мешавад. 
       Бояд гуфт, ки иқдоми мазкур як навиди хушест барои маъюбону шахсони имконияташон маҳдуд  дар рӯзи байналхалқии маъюбон, ки ҳамасола 3 декабр таҷлил мешавад.