Дарёфт ва мусодираи зиёда аз 34 кило маводи нашъадор

Душанбе, 17.12.2015. (АМИТ «Ховар) -Ҳангоми гузаронидани чорабиниҳои фаврӣ-ҷустуҷӯӣ 9 декабри соли равон аз ҷониби кормандони милитсия дар кӯчаи А.Дониши шаҳри Душанбе мошини тамғаи “Тайота-Ланд-Крузер”, таҳти идораи ронанда, марди 37-солаи сокини шаҳри Хоруғ боздошт шуд. Дар вақти азназаргузаронии мошини мазкур аз дохили борхалтаи варзишии мусофир, ҷавони 19 сола, донишҷӯи бахши 3 Донишгоҳи геологияи шаҳри Хоруғ  10 килою 710 грамм маводи нашъадори навъи ҳашиш  дарёфт ва мусодира шуд. 
15 декабри соли равон, зимни чорабиниҳои фаврӣ- ҷустуҷӯӣ дар назди маркази савдои “Мардон”, воқеъ дар кӯчаи Борбади шаҳри Душанбе, марди 42-солаи сокини ноҳияи Рӯдакӣ аз ҷониби кормандони милитсия дастгир шуд. Ҳангоми азназаргузаронии мошини шахсиаш тамғаи “Мерседес-Бенс”, аз дохили борхалтааш 990 грамм маводи нашъадори навъи афюн дарёфт ва мусодира гардид. 
Инчунин ҳангоми азназаргузаронии хонаи хоҳараш- зани 40 солаи сокини ноҳияи Рӯдакӣ, аз дохили анборхона 22 килою 680 грамм маводи нашъадори навъи афюн дарёфт ва мусодира шуд.
Дар маҷмӯъ 34 килою 380 грамм маводи нашъаовар дарёфт ва мусодира гардид. 
Нисбат ба далелҳои мазкур парвандаи ҷиноятӣ оғоз гардида, тафтиш идома дорад.