Дастгир гардидани дуздон

Душанбе, 08.12.2015. (АМИТ «Ховар)  — Дар бозори “Корвон”-и пойтахт кормандони милитсия ду ҳодисаи дуздиро ошкор намуданд. 
Зимни гузаронидани чорабиниҳои фаврӣ-ҷустуҷӯӣ марди 32 солаи ноҳияи Фархор ҳамчун гумонбар дар дуздӣ аз ҷониби кормандони милитсия дастгир гардид. Муайян карда шуд, ки номбурда 29 ноябри соли равон, тахминан соати 13:00 дақиқа, аз ҷайби  зани 46 солаи сокини шаҳри Ваҳдат 12000 рубли Федератсияи Русияро дуздида, аз ҷойи ҳодиса ғайб задааст. 
Ҳамчунин зани 45 солаи сокини Ҳисор низ бо гумони дуздӣ дастгир  шуд. Номбурда 26 ноябри соли равон, тахминан соати 15:30 бо роҳи пинҳонӣ вориди дӯкони зани 30 солаи сокини шаҳри Душанбе, воқеъ дар бозори “Корвон” шуда, аз он ҷо 1230 сомонӣ ва ҷавоҳироти нуқрагин, ҷамъ ба маблағи 3980 сомониро дуздида, аз ҷойи ҳодиса ғайб задааст. 
Аз рӯи ин ҳодисаҳо парвандаи ҷиноӣ оғоз гардида, тафтиш идома дорад.