Энергетикҳои Тоҷикистон ид доранд

Душанбе, 22.12.15. (АМИТ «Ховар»). – Имрӯз, 22  декабр,  дар  рӯзи  кӯтоҳтарини  сол,  энергетикҳои  Тоҷикистон  иди  касбии  худро  таҷлил  менамоянд. Ба  ифтихори  ин  дар  ШСХК «Барқи  тоҷик»  бо  иштироки  муовини  якуми  раиси  ширкат  Маҳмадумар  Асозода  маҷлиси  ботантана  баргузор  мешавад. 
Тавре  ки  роҳбари хадамоти  матбуоти  ШСХК «Барқи  тоҷик»  Нозир  Ёдгорӣ  ба хабарнигори  АМИТ «Ховар»  изҳор  дошт,  муовини  якуми  ШСХК «Барқи тоҷик»  М.Асозода  зимни  суханрониаш  дар маҷлис  аз  таърихи таъсису  рушди  низоми энергетикии  Тоҷикистон  мухтасар нақл  карда, роҳбарони  шабакаҳои  барқро  даъват  менамояд, ки  реҷаи интиқоли  барқро мувофиқи  меъёрҳои  муқарраршуда  риоя  намоянд. 
Сипас  собиқадорони  соҳаи  энергетика сипосгузорӣ ва   пешқадамони бахши  тавлиди  нерӯи  барқ  бо  нишонҳои  аълочиёни  «Барқи тоҷик» ва ифтихорномаҳо мукофотонида  мешаванд. 
Ёдовар  мешавем, ки  иди  энергетикҳо  бори нахуст  бо Фармони Президиуми Шӯрои  олии  ИҶШС аз  23  майи   соли  1966 ба  хотири  рӯзи қабули Нақшаи   давлатии  электриконии  Русия  дар Анҷумани  8 – уми  умумирусиягии  Шӯроҳо 22  декабр  соли  1920  тасдиқ  гардида буд.
Дар  Тоҷикистон  22  декабр,  яъне  Рӯзи  энергетик  бо  мавриди  истифода  қарор  гирифтани  НБО – Варзоб – 1  иртибот  дорад. Рӯзи  энергетик, ки барои баъзеҳо  маънои «гармию  равшанӣ» — ро  дорад, иди  умумихалқист.