Филми «Гумроҳшудагон»-бозгӯкунандаи рӯзгори ҷавонони гумроҳ

Конибодом, 02.12.2015. (АМИТ «Ховар») -Дар мақомоти иҷроияи ҳокимияти давлатии шаҳри Конибодом якҷоя бо Хадамоти муҳоҷират дар вилояти Суғд, шуъбаи Вазорати корҳои дохилӣ, шуъбаи кор бо занон ва оила, бахши ҷавонон, варзиш ва сайёҳӣ ва бо иштироки намояндагони касбу кори гуногун, роҳбарони ташкилоту муассисаҳо, ходимони дин ва фаъолони шаҳр ҷамъомади васеъ доир гардид. Ҷамъомад дар мавзӯи пешгирии шомилшавии ҷавонон ба ҳизбу ҳаракатҳои ифротгаро, тарбияи ҷавонон дар рӯҳияи хештаншиносиву ифтихори миллӣ, масъулияти падару модар дар таълиму тарбияи фарзанд ва ахлоқу тарбияи ҷавонон сурат гирифт. 
Зимни ҷамъомад иштирокдорон ва хонандагону ҷавонон доир ба сабабу оқибатҳои даст задан ба ҷинояткорӣ, ба роҳ мондани робитаи устувори оила ва мактаб саволҳо пешниҳод намуда, посух гирифтанд. Ҳамчунин дар мулоқот оид ба тақдири ҷавонони гумроҳ, ки бинобар бемаърифатиашон шомили ҳизбу гурӯҳҳои ҷангҷӯёна гардидаанд, филми мустанад бо номи «Гумроҳшудагон» намоиш дода шуд.