Истифодаи асъори юани чинӣ барои кам намудани фишорҳои қурбӣ мусоидат хоҳад кард

Душанбе, 4.12.2015. (АМИТ «Ховар»).-  Низоми ягонаи электронии савдо дар бозори байнибонкии асъор тавассути платформаи кории ширкати “Томсон Ройтерс” омода шуда, ба воситаи он амалиёти хариду фурӯши асъор аллакай амалӣ шуда истодааст. Бонки миллии Тоҷикистон дар ин низом ҳамарӯза ба ташкилоти қарзӣ фурӯши доллари амрикоиро анҷом дода, тавассути ташкилоти қарзӣ дахолатҳои асъорӣ — фурӯши доллари нақди ИМА-ро дар нуқтаҳои мубодилаи ш. Душанбе ба роҳ мондааст”,-гуфт муовини аввали раиси Бонки миллии Тоҷикистон Ҷ. Нуралиев зимни нишасти матбуотии имрӯза.
    Инчунин дар нимаи дуюми соли ҷорӣ барои  диверсификатсияи амалиёти берунаи асъорӣ, созишномаи СВОП бо асъори юани чинӣ ба имзо расид, ки истифодаи босамари он барои кам намудани фишорҳои қурбӣ мусоидат хоҳад кард. Мубодилаи он ба таври озмоишӣ (пилотӣ) рӯзҳои наздик оғоз мегардад.
    Аз ҳисоби мутахассисони БМТ ситод ва гурӯҳҳои кории фаврӣ барои назорати мунтазами фаъолияти муассисаҳои ташкилоти қарзӣ дар бозори дохилии асъор  ташкил ва ба фаъолият шурӯъ карданд.
“Илова бар ин, бо дастури Бонки миллии Тоҷикистон дар тамоми ташкилоти қарзии ҷумҳурӣ ситодҳои доимии назорат аз болои фаъолияти нуқтаҳои мубодилаи асъор вобаста ба хариду фурӯши асъори хориҷӣ ташкил шуданд ва онҳо ҳамарӯза амал менамоянд”,-илова намуд муовини аввали раиси БМТ.