Кӯҳистони Мастчоҳ: Ҷалби ҷавонон ба донишомӯзӣ

Душанбе, 11.12.2015. (АМИТ «Ховар»).- Дирӯз роҳбарони муассисаҳои олии вилояти Суғд бо хамткунандагон ва аҳли ҷамъияти ноҳияи Кӯҳистони Мастчоҳ суҳбати самимӣ ва  ошкоро гузарониданд.
Намояндаи  мақомоти иҷроияи ҳокимияти давлатии вилояти Суғд Мирзотоҳир Набиев гуфт, ки тибқи дастури раиси вилояти Суғд Абдураҳмон Қодирӣ чунин вохӯриҳо бо ҳайати номбурда бори аввал сурат гирифта,  ҳадафи он ҷалби бештари ҷавонон ба донишомӯзиву баланд бардоштани маърифати ҷомеа аст.
Анвар  Мақсудов —  ректори Донишгоҳи давлатии Хуҷанд  ба номи академик Бобоҷон Ғафуров аз дастовардҳои имрӯзаи донишгоҳ  маълумот дод. Инчунин дар вохӯрӣ роҳбарони дигар муассисаҳои олии вилоят сухан гуфтанд.
Раиси  ноҳияи Кӯҳистони  Мастчоҳ  Маҳмадҷобир Раҷабзода  зикр намуд, ки  имрӯз аз ноҳия дар муассисаҳои олии ҷумҳурӣ наздик ба 500 донишҷӯ таҳсил мекунанд. 
Зикр шуд, ки дар оянда махсусан барои ба таҳсил фаро гирифтани духтарон  эътибори ҷиддӣ дода мешавад.