Кумитаи кор бо занон ва оила вобаста ба оила консепсия қабул мекунад

Душанбе, 12.12.2015. (АМИТ Ховар).- 11 декабри  соли 2015 дар Кумитаи рушди маҳали назди Президенти Ҷумҳурии Тоҷикистон бахшида ба  Соли оила ҷаласа  баргузор гардид.  Муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон  Давлатзода Зулфия гуфт, ки соли равон дар доираи  Соли оила як зумра чорабиниҳо   дар мавзўъҳои «Оилаи хушбахт», «Кадбонуи беҳтарин», «Модар чӣ гуна- духтар намуна» дар миқёси  ҷумҳурӣ баргузор гардиданд.  Ҳамчунин ў ёдовар шуд, ки дар атрофи мавзўи оила якчанд  санаду меъёрҳо қабул шудаанд, ки  дар заминаи он Консепсияи Кумитаи кор бо занон ва оилаи назди Ҳукумати Ҷумҳурии Тоҷикистон таҳия мешавад. 

Инчунин дар ҷаласа   Шамси Мунир, мудири шуъбаи ташкилии кумита дар бораи никоҳи хешутаборӣ ва оқибатҳои он ҳарф зад. Ў тавсия дод, ки пеши роҳи никоҳи хешутаборӣ гарифта шавад ва ҷавонон пеш  аз хонадор шудан бояд аз муоинаи тиббию ташхис гузаранд.  Ў таъкид намуд, ки аз никоҳи хешутаборӣ  тифлони маъюб ва носолим таваллуд мешаванд, ки  имрўз шумораашон дар Ҷумҳурии Тоҷикистон ба  26 000 (бисту шаш ҳазор) расидааст.