Мошини Корвони саломатии ҷумҳуриявӣ ба садама дучор гардид

Душанбе, 24.12.2015. (АМИТ «Ховар»). — 23 декабри соли 2015 соати 12:47 ронандаи Корвони саломатии ҷумҳуриявӣ бо мошини сабукрави тамғаи  «Нива» Аҳмадулло Арбобов, сокини шаҳри Душанбе, кўчаи А.Ҷомӣ ҳангоми ҳаракат аз шаҳри Хоруғ ба самти ноҳияи Мурғоб дар километри 866 мавзеи Упалӣ  аз уҳдаи идораи  мошин  набаромада, бо 3 нафар мусофиронаш: Мирзовалӣ Гадоев, соли таваллудаш 1958, истиқоматкунандаи шаҳри Душанбе, кўчаи Телман 6, духтури Маркази ҷумҳуриявии клиникаи бемориҳои пӯст,  Воҳид Раҳмонов, соли таваллудаш 1966, сокини шаҳри Душанбе, кўчаи Ҷомӣ 46, духтури Маркази ҷумҳуриявии клиникаи эндокринология;  Эгам Юлдошев, соли таваллудаш 1969, сокини ноҳияи Шаҳринав, ҷамоати деҳоти Ҷуст, муовини аввали директори Маркази ҷумҳуриявии касалиҳои дил  ба садама дучор гардид.
Мусофирон бо гирифтани ҷароҳатҳои гуногуни ҷисмонӣ дар  беморхонаи деҳаи Ванқалъаи  ноҳияи Шуғнон бистарӣ шудаанд.
Ҳангоми гирифтани хабар аз сокинони деҳа соати 13:00  наҷотдиҳандагони Дастаи зудамали наҷотдиҳии Ситод оид ба ҳолатҳои фавқулодда ва мудофиаи грждании кумита дар Бадахшон бо роҳбарии командири ДМЗН капитан Б. Сайфиддинов ва сардори Ситод полковник Д Худоёров аз тариқи чархбол ба ҷои ҳодиса сафарбар шуда, соати 16:00 мусофиронро ба беморхонаи вилоятии шаҳри Хоруғ интиқол доданд.