Музди меҳнати муҳоҷирзанон пардохт гардид

     Душанбе, 04.11.2015. (АМИТ «Ховар»).-Муҳоҷири меҳнатӣ дар Федератсияи Русия  Шарифамоҳ Ризоеваи  48-сола, ки  сокини шаҳри Душанбе мебошад, аввали моҳи  ноябри соли  равон ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия   оид ба напардохтани музди маошаш аз ҷониби корфармо  муроҷиат намуд. Пас аз муроҷиати расмии намояндагӣ ва гузаронидани гуфтушунид бо роҳбарияти ширкати истеҳсолӣ оид ба масъалаи уҳдадориҳои тарафҳо дар асоси Кодекси меҳнати Федератсияи Русия  29 ноябри соли равон ба Шарифамоҳ Ризоева ва  12  муҳоҷирзани дигар   музди маоши шашмоҳаашон  пурра пардохт гардид. 
             Бо дастгирии намояндагии мазкур инчунин  музди маоши  гурӯҳи занони муҳоҷири тоҷик, ки дар ташкилоти истеҳсолии вилояти Новосибирск фаъолият мекарданд ва ба гуфти роҳбари ширкат  бо сабаби мушкилоти молиявии корхона    музди маоши  моҳонаашонро нагирифта буданд, пурра   пардохт гардид, ки ин маблағ зиёда аз 1 миллиону 800 ҳазор рублро  ташкил медиҳад.