Нақши шахс, роҳбар дар таърих ва ҷомеа

Душанбе, 7.12.2015. (АМИТ «Ховар»).- Дар Кумитаи кор бо занон ва оилаи назди Ҳукумати Ҷумҳурии Тоҷикистон семинари омӯзишӣ дар мавзӯи «Нақши шахс, роҳбар дар таърих ва ҷомеа» баргузор гардид. Дар он донишҷӯдухтарони фаъоли донишгоҳҳои пойтахт, кормандони соҳаҳои гуногун ва занони фаъол иштирок намуданд.
Дар семинари омӯзишӣ раиси кумита, доктори илмҳои фалсафа, профессор Махфират Хидирзода, номзади илмҳои фалсафа, дотсенти кафедраи «Фалсафа ва сиёсатшиносӣ» — и Донишгоҳи Давлатии Тоҷикистон Д. Хуморов  дар атрофи масъалаҳои нақши Президенти мамлакат  Эмомалӣ Раҳмон дар таҳкими давлатдорӣ, пойдории сулҳу ваҳдат ва ягонагии кишвар, таъмини ҳифзи манфиатҳои кишвар дар арсаи байналмилалӣ сухан гуфтанд. Аз ҷумла, зикр гардид, ки муваффақияти Президенти мамлакат дар эътимод ва эътиқоди мардум аст, ки дар симои ин шахсияти таърихӣ сарвар ва пешвои воқеии худро мебинанд. Рушди бонизоми кишвар ин худ нишонаи он аст, ки сарвари сиёсӣ тавонист дар сиёсати худ татбиқи ҳадафҳои ҳаётан муҳимро дуруст муайян намояд, ки ин ба муваффақияти сарвар таъсири муҳим дорад.
Иштирокдорони семинар дар муҳокимаҳо иштирок намуда,  ақидаҳои худро оид ба масъалаи махкур баён намуданд.