Оғози парвандаҳои ҷиноятӣ нисбат ба чорводуздон

Душанбе, 24.12.2015. (АМИТ «Ховар»). —  23 декабри соли равон, тахминан соати 24:00 шахсони  номаълум  бо  роҳи пинҳонӣ вориди оғилхонаи сокини 50-солаи ноҳияи Қубодиён гардида, аз он ҷо 20 сар чорвои хурди шохдорро, ки арзишашон 20000 сомониро ташкил медиҳад, дуздида аз ҷойи ҳодиса ғайб задаанд. Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия бо гумони дуздии чорвои мазкур сокини 38-солаи ноҳияи Шаҳритус дастгир шуд. 
Ҳамчунин дар ин рӯз дуздии як сар чорвои калони шохдор, ки моҳи июни соли 2014 аз дохили оғилхонаи сокини 29-солаи шаҳри Ваҳдат дуздида шуда буд, ошкор гардид. Муайян карда шуд, ки чорвои мазкур, ки арзишаш 4400 сомониро ташкил медиҳад, аз ҷониби ду сокини 30 ва 22-солаи шаҳри Ваҳдат дуздида, фурӯхта шудааст ва онҳо маблағи ба дастовардаашонро ба манфиати худ сарф намудаанд. 
Нисбат ба далелҳои мазкур парвандаҳои ҷиноятӣ оғоз гардида, тафтиш идома дорад.