Семинари омӯзишӣ дар Раёсати ВКД

Душанбе, 5.12.2015. (АМИТ «Ховар»).- Тибқи нақшаи чорабиниҳо оид ба татбиқи «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020» аз тарафи кормандони Агентии назорати маводи нашъаоварии назди Президенти ҶТ дар бинои маъмурии Раёсати ВКД дар шаҳр Душанбе семинари омӯзишӣ гузаронида шуд, ки дар он кормандони шуъбаҳои ВКД дар ноҳияҳои шаҳрӣ ва дастгоҳи марказии раёсат шаркат варзиданд.
    Тибқи иттилои АНМН семинари мазкур дар чорчӯбаи нақшаи баланд бардоштани самаранокии фаъолияти мақомоти ҳифзи ҳуқуқ оид ба пешгирии ҷиноятҳои вобаста ба маводи нашъаовар ва истеъмоли воситаҳои нашъадор ташкил  шуд.
    Чунин семинарҳо дар ноҳияҳои Рӯдакӣ, Ваҳдат ва Шаҳринав, инчунин ш. Турсунзода гузаронида шуданд.
    Дар семинарҳои омӯзишии баргузоргардида ба кормандони милиса иттилоот оид ба вазъи нашъамандӣ дар ҶТ ва минтақа, масирҳои асосии интиқоли маводи нашъаовар, қонунгузорӣ, истилоҳоти вобаста ба муомилоти маводи нашъаовар, намудҳои нави маводи нашъаовар пешкаш гардиданд.
    Дар семинари омӯзишии мазкур зикр гардид, ки имкониятҳо ва дараҷаи ихтисоси кормандони мақомоти ҳифзи ҳуқуқ бояд босуръат баланд бардошта шавад, то ки роҳи зиёдшавии ҷинояткорӣ, аз ҷумла ҷиноятҳои вобаста ба маводи нашъаовар гирифта шавад. Аз ҳамин лиҳоз, доштани маълумоти пурра дар бораи маводи нашъаовар, вазъи нашъамандӣ дар ҷумҳурӣ ва минтақа муҳим мебошад.